白票與白痴
完善選擇制度又會驚人投白票嘅？
中央完善了香港的選舉制度後，細節還未落實，再經本地立法生効，成為下一次選舉的程序。大家當然沒有任何興趣，投票率必然偏低，這是可以預期。但這幾天，話題卻轉到投白票這回事。而他們居然怕得要死，指摘倡議投白票的說法，高官連番追擊，政制及內地事務局局長甚至可以說到，「組織或煽動投白票、廢票有機會影響選舉結果，等同操縱選舉，當局會研究規管」。
正苦官員的反智，往往令人嚇一跳！首先，既然是「完善」的選舉制度,一定是公平公正，人人應該爭住投票，何以會有投白票的憂慮呢？難道這班人也知道新的制度完全不可取？而且下星期才上立法會，還未正式通過已經驚住會白票過多？那豈不是自打嘴巴？這是一個甚麽樣的強勢正苦？真係假都比你掉清！
再講，正苦經常開口埋口只係一小撮人攪局，但又經常怕得要死，係咪有啲思覺失調。全港登記選民據說有四百幾萬，而有二百五十幾萬人撐完善選舉制度，之前又話有三百幾萬人撐國安法，咁點解會驚嗰一小撮人呢？唔通嗰啲數字係假嘅？
大家在知道中央出手改善之後，早已沒興趣再跟進細節。白票之說不知從何而來，但經此一提，大家才好奇，究竟低投票率冇面，還是高投票率但白票率也高才更冇面呢？正苦官員便紛紛衝出來告訴大家，後者一定更冇面！如果「組織或煽動投白票」是一項罪行，這些官員的言論，是極可能被介定為「操縱選舉」了。
又如果我鼓勵大家高度參與選舉，千萬不要投白票，但偏偏我是燈神，大家看完我的文，卻做相反的事，那我會不會犯法？（不過香港正苦至係超級燈神！）
然後，他們可以如何規管？投票是不記名，是在一個最保密的空間，投下一票，不可以告訴別人你投了誰，也不能將選票向別人顯示，更不能拍照，那怎麼樣規管？
如果改成記名投票，每張票都人手檢查，不是很費時失事嗎？如果連去投個票都可能誤墮法網，要拉要鎖，咁其實班撐正苦人士咪重驚，一個唔覺意，攪到投票率超低，咁都係大鑊喎！其實既然船頭驚鬼船尾驚賊，不如直接取消選舉，全部委任，呢個提議早已多次有人提出，而好明顯係有効，直接達到佢哋想要嘅效果，又唔比機會啲人玩野，重應該慳唔少時間同資源，唔止雙贏（佢地贏兩次），直頭佢哋想贏幾多次都得！
咁嘅絕世好橋，重考慮咁多做乜！